Vizuallaşdırılmş innovativ fizika dərslikləri

       Çox hörmətli həmkarlarım, heç kimə sirr deyil ki, fizikanın ümumtəhsil məktəblərində tədrisi bizim üçün aktual məsələlərdəndir. Bu mövzuda fizika dərslikləri ilə bağlı müzakirələr və mübahisələr də həmişə diqqət mərkəzindədir. İnternet üzərinddən araşdırmalarım zamanı qarşılaşdığım dərslik sahəsindəki bir yeniyi sizinlə bölüşmək istəyirəm.
Reallıqlarla zənginləşdirilmiş innovativ fizika dərsliyinin düşünürəm ki , dünyada analoqu yoxdur.Təbii ki, bu dərslik geniş kütlə üçün nəzərdə tutulmayib və istehsalçı tərəfindən şəxsi biznes sahəsinin inkişafina hədəflənmişdir.Bununla belə, hadisə özlüyündə dərslik sahəsində innovasiyadır.Video rus dilində olduğu üçün tərcümə və şərhə ehtiyac duymadım.
   

                          

Təhsil Nazirliyi və “Edumedia-Azərbaycan” təşkilatı fizika, kimya və biologiya müəllimləri üçün Yeni Müsabiqəyə başlayır

 “TƏBİƏT FƏNLƏRİ ÜZRƏ LABDİSK RƏQƏMSAL LABORATORİYA AVADANLIĞININ TƏDRİSDƏ TƏTBİQİ” MÜSABİQƏSİnin nəticələri elan olundu!

 Müsabiqənin rəsmi İnternet səhifəsi www.musabiqe.edu.az saytıdır.Müsabiqə iki nominasiyada keçirilmişdir.

I Nominasiya. Ən yaxşı müəllim işi

Bu nominasiya üzrə fizika, kimya və biologiya fənləri üzrə ümumtəhsil müəssisələrində müəllimlər üçün təşkil olunan "Labdisk avadanlığı və Globilab proqram təminatından istifadə" təlimlərində iştirak edən, bu avadanlıqlarla təmin olunmuş məktəblərin bütün müəllimləri iştirak hüququ əldə etmişdir.

II Nominasiya. Ən yaxşı təlimçi işi

Bu nominasuya üzrə fizika, kimya və biologiya fənlərindən "Labdisk avadanlığı və Globilab proqram təminatından istifadə" üzrə 20-23 fevral və 2-4 iyul 2015-ci il tarixlərində xarici təlimçilərin təlimində iştirak edən müəllimlər müraciət edə bilərlərdilər.
Müsabiqənin təşkilatçıları :“Edumedia-Azərbaycan” və “Globisens” şirkətləridir

Müsabiqə Təhsil Nazirliyi tərəfindən rəsmi olaraq  dəstəklənir.
Müsabiqə hədiyyələri: qaliblər   “iPad air” 16 GB,   “Globimate” planşet,  “Samsung Galaxy Tab-3, 7” 8 GB  və s. hədiyyələrlə mükafatlandırılacaqlar.

PS:6 aprel tarixində "Labdisk-rəqəmsal laboratoriya avadanlıqlarının təbiət elmlərində tətbiqi müsabiqəsi" nin "Ən yaxşı müəllim işi-fizika" nominasiyası ürəkaçan nəticələri ilə yekunlaşdı.Bu müəllimlər videogörüntü hesabına göz aldatmadılar! Həqiqətən də maraqlı, ətraflı izahı ilə yeni təcrübələr etdilər və müsabiqədə     biz ekspertlərin və münsiflərin      rəğbətini qazandılar. Dəyərli həmkarlarım , müdavimlərim )))  Bextiyar Bayramovun və Rahib Əfəndiyevin qalibiyyəti isə məni xüsusi olaraq qürurlandırır. Buyurun , təcrübələri izləyin
https://www.youtube.com/watch?v=7lSa0zRAG-0&feature=youtu.be
https://www.youtube.com/watch?v=AbdSrUlsPdY&feature=youtu.be
https://www.youtube.com/watch?v=OpH_UDPYuOE&feature=youtu.be

                              

YENİ TƏHSİL PROQRAMI ( KURİKULUM)dan bəzi qaranlıq məqamlar SUAL -CAVAB əsasında

SUAL 1: Məzmun standartları neçə yerə ayrılır və hansılardır?
CAVAB: 2 yerə ayrılır - bilik və fəaliyyət.

SUAL 2: Biliyin neçə kateqoriyası var və hansılardır?
CAVAB: 3 kateqoriyası var - deklarativ; prosedural;kontekstual.

SUAL 3: Blum taksanomiyasında altı mərhələnin ən aşağı 2 mərhələsi olan bilmə və anlama ilə hansı bilik kateqoriyası əlaqələndirilir?
CAVAB: Deklarativ.

SUAL 4: Blum taksanomiyasında tətbiq mərhələsiylə hansı bilik kateqoriyası əlaqələndirilir?
CAVAB: Prosedural.

SUAL 5: Hansı bilik kateqoriyası hər hansı prosesdə əldə edilən yeni informasiya və ya müəyyən informasiyaları tətbiq edildikdə yeni məna alan proseslər kimi dəyərləndirilir?
CAVAB: Kontekstual.

SUAL 6: Bilik kateqoriyalarının standartlar üzrə uyğun nisbətlərdə bölgüsü hansı məsələlərin nəzərə çatdırılmasına və həyata keçirilməsinə xidmət edir?
CAVAB: İnformasiyalar yaddaşda mühafizə edilməli deyil,onlar problemin həllində səmərəli istifadə edilməlidir. İnformasiyalar şagirdlər tərəfindən yeni informasiyaların yaradılmasına yardımçı olmalıdırlar.

SUAL 7: Fəaliyyətin neçə növü var və hansılardır?
CAVAB: 3 növ-idraki; ünsiyyət; psixomotor.

SUAL 8.Idraki bacarıqlar hansılardır?
CAVAB: Bilmə - xatırlamaq; tanımaq; göstərmək; sadalamaq; adlandırmaq.
Anlama - izah etmək; nümunə göstərmək; öz sözləri ilə təsvir etmək; fərqləndirmək.
Tətbiqetmə - həll etmək; istifadə etmək; cümlə qurmaq.
Təhliletmə - hissələrə ayırmaq; struktur müəyyənləşdirmək; müqayisə etmək.
Sintezetmə - yaratmaq; plan tutmaq; tərtib etmək.
Dəyərləndirmə - münasibət bildirmək; qərar qəbul etmək.

SUAL 9. Ünsiyyət bacarıqları hansılardır?
CAVAB: izah etmək; təsvir etmək; təqdim etmək; şərh etmək; reaksiya vermək.

SUAL 10. Psixomotor bacarıqları (fiziki inkişafın mərhələləri) hansilardir?
CAVAB: Hissetmə - hərəkətlərin icrasından əvvəl öz imkanlarını müəyyənləşdirir.
Hazırolma - hərəkətlərin icrasına hazırlıq işləri aparılır.
Təqlidetmə - nümayiş etdirilən hərəkətləri təkrarlayır.
Mexanizmin mənimsənilməsi - hərəkətləri qaydalara uyğun yerinə yetirir.
Mükəmməl icra - formalawmış hərəkətlər nümayiş etdirir.
Uyğunlaşma - hərəkətin icrası zamanı yaranmış problemi həll etmək üçün davranışda dəyişikliklər edir.
Yaradıcılıq - yeni fəaliyyət nümunələri yaradır

Fənnin məqsədi fənn üzrə ümumi təlim nəticələridir və MƏZMUN XƏTTİ ilə səciyyələnir. Məzmun xətti ƏSAS STANDART və ALT STANDART ilə səciyyələnir.

MƏZMUN XƏTTİ - dəyişməzdir. Kodlaşdırmanın ən önundə gəlir. Məsələn: 1.1.2. və ya 1.2.2. Burada ən başda duran 1 - məzmun xəttidir.

ƏSAS STANDART - əsasən dəyişməzdir. Kodlaşdırmada ikinci yerdə durur. Məsələn: 1.2.1 və ya 3.2.1. Burada ortada, yəni ikinci sırada duran 2 - əsas standartdır.
Əsas standartın funksiyaları aşağıdakılardir:
* Fənlər üzrə müəyyən olunan təlim nəticələrini məzmun xətləri üzrə ümumi şəkildə ifadə edir.
* Siniflər və fənlər üzrə summativ qiymətləndirmənin aparılmasını təmin edir.

ALT STANDART - daim dəyişəndir. Kodlaşdırmada ən sonda durur. Məsələn: 2.2.1. və ya 3.2.1. Burada ən sonda, yəni üçüncü sırada gələn alt standartdır.
Alt standartın funksiyaları aşağıdakılardir:
* Təlim məqsədlərinin dəqiq müəyyən olunması üçün etibarlı zəmin yaradır.
* Təlim strategiyalarının düzgün seçilməsində mühüm rol oynayır.
* Təlimdə inteqrativliyi təmin edir.
* Təlimin məzmununun davamlı inkişafını təmin edir.

KSQ və BSQ hesablamaları üçün tövsiyyələr

NASA-dakı yeganə azərbaycanlı Bakıda

Dünyanın aerokosmik tədqiqatlar mərkəzi hesab olunan NASA-da elmi tədqiqatla məşğul olan ilk və yeganə azərbaycanlı gənc alim Teymur Sadıxov Bakıda seminar verib.
.Gənc alim Gənc Mühəndislərin İnkişafı İctimai Birliyinin (GMİİB) təşkil etdiyi seminarda o, özü haqqında məlumat verdikdən sonra robot texnologiyaları, robotiksin müxtəlif tərifləri və növləri haqqında danışıb. Təqdimatın digər hissəsində hal-hazırda robot texnologiyalarının vəziyyəti, qarşılaşılan çətinliklər və üzərində işlədiyi layihələr haqqında auditoriyanı məlumatlandırıb.
Teymur Sadıxov Bakı şəhərindəki 211 saylı orta məktəbin məzunudur. O, orta məktəbi 9 ilə başa vurub. Dünyaca tanınmış İstanbul Texniki Universitetin 240 illik tarixi ərzində ilk və yeganə ən yüksək ballı məzunudur. Teymur İstanbul Texniki Universitetində bakalvriat səviyyəsində dövlət xətti ilə təhsil alıb, ABŞ-ın Corciya Texnologiya İnstitutunun magistratura təhsilini dövlət proqramı ilə davam etdirib. Hazırda Corciya Texnologiya İnstitutunda doktorantura (Phd) səviyyəsində təhsil alır.
27 yaşlı soydaşımız hazırda NASA-nın Jet Propulsion laboratoriyasında Robotik Sistemlərin Qiymətləndirilməsi, Qərar və nəzarət qrupunda elmi tədqiqatçı, Mars planetində olan Curiosity Rover-in avtonom idarə olunması, eləcə də JPL yüksək mobilli çoxməqsədli təkərli nəqliyyat vasitəsinin avtonom, insansız idarə olunması layihələrinin iştirakçısıdır
İstanbul Texniki Universitetində Təyyarə və Kosmik Elmlər fakültəsinin Təyyarə Mühəndisliyi ixtisası üzrə təhsil alan Teymur Sadıxov hələ tələbə ikən dik və qısa məsafədə havaya qalxan və enən nəqliyyat vasitələrinin simulyasiyası və nəzarəti ilə bağlı elmi araşdırmalar aparıb. Bundan başqa o, yanacaq hüceyrəsi ilə çalışan yarış avtomobilinin manual nəzarətdən avtonom idarəetməyə keçirilməsi üzərində işləyib. İşinin çoxluğuna baxmayaraq, Teymur təhsilini davam etdirmək arzusunu həyata keçirməyə tələsirdi. Belə bir perspektivli gəncin üzünə dünyanın bütün universitetlərinin qapısı açıq idi. O, indiyədək xaricdə təhsil almış yeganə azərbaycanlıdır ki, təhsilin növbəti pilləsi üçün müraciət etdiyi 10 tanınmış ali məktəbin hamısından müsbət cavab alıb və təhsil müddətində ona yüksək təqaüd təklif olunub.
2008-ci ildə Kaliforniya Universitetinin San-Diego Mexanika və Aerokosmik Mühəndislik fakültəsində “Powell” fondu təqaüdçüsü olaraq elmi təhsilə başlayan soydaşımız çoxrobotlu sistemlərin kooperativ və paylaşımlı nəzarəti üçün alqoritmlər üzrə elmi tədqiqat aparıb.
2010-cu ildə isə məşhur alim Vassim M.Haddadın dəvətilə ABŞ-ın ən böyük və yüksək reytinqli Aerokosmik Mühəndisliyi fakültəsinə malik Corciya Texnologiya İnstitutunda təhsilə başlayıb və hazırda burada doktorantura dərəcəsinə namizəddir. Teymur 2013-cü ildə “United Technologies Corporation” təşkilatının elmi-tədqiqat mərkəzinin Avtonom və Ağıllı Robotik Sistemlər Laboratoriyasında avtonom vertolyotların şəhər mühitində qəzasız optimal trayektoriya planlaması ilə əlaqəli elmi tədqiqatla məşğul olub. Bu layihə vertolyotların avtonomlaşdırılması üçün planlaşdırılıb.
Soydaşımızın uğurlu elmi-tədqiqat layihələri bununla bitmir. Müasir dünyada ən qabaqcıl texnologiyaların cəmləşdiyi aerokosmik sahədə tanınmış alimlərlə çiyin-çiyinə çalışan Teymur Sadıxovun ən böyük arzusu bu sahədə öz sözünü deməkdir.

Müasir təlimin prinsipləri

1. Şəxsiyyətə yönəlmiş təlim prinsipi
Nə üçün uşaqlar erkən yaş dövründə daha fəal olurlar? Bir qədər inandırıcı olmasa da elmi araşdırmalar göstərir ki, insan bütün ömrü boyu qazandığı məlumatın təxminən 70% -ni 6 yaşa qədər əldə edir. Paradoks ondan ibarətdir ki, məktəbə daxil olduqdan sonra uşağın idrak fəallığı müəyyən dərəcədə ləngiməyə başlayır. Bu nəyə görə baş verir?
İş ondadır ki, məktəbəqədər dövrdə uşaq dünyanı bir tədqiqatçı kimi dərk edir: o, suallar verir, bu suallara cavab tapmaq üçün öz imkanı dairəsində müxtəlif məlumat mənbələrindən istifadə edir və ilk növbədə öz təcrübəsinə əsaslanır. Onu əhatə edən dünyanı müstəqil dərk edərək uşaq öz maraqlarına görə fəaliyyət göstərir.
Birinci sinfə qəbul olarkən uşaq elə bir təlim mühitinə düşür ki, burada ondan adət etdiyi, təbii olan öyrənmə metodundan əl çəkmək tələb olunur. Müəllim tələb edir ki, uşaq ona diqqətlə qulaq asıb dediklərini yadda saxlasın, təlimatlarını dəqiq yerinə yetirsin və bu təlimata aid olmayan sualları az versin. Bununla şagirdə, demək olar ki, passiv mövqe tutmaq, tətqiqatçı rolundan imtina etmək və müəllim tərəfindən verilən məlumatla kifayətlənmək təklif olunur. Bu cür təlim prosesinin mərkəzində şagird yox, müəllim dayanır. Məhz müəllim təlim prosesinin fəal iştirakçısı olur və şagirdə nəyi və necə dərk edilməsini diktə edir. Bunun nəticəsində şagirdin dərketmə imkanları məhdudlaşır, onun ehtiyacları, maraq və qabiliyyətləri nəzərə alınmır.
Deməli, şagirdin fəallaşması üçün ilk növbədəi, onun, bir şəxsiyyət kimi təlim prosesinin mərkəzi obyekti kimi çıxış etməsi vacibdir. Təlim uşağın maraq və tələbatlarına, onun bilik səviyyəsinə, imkan və qabiliyyətlərinə yönəlməlidir. Müəllim tərəfindən şagirdə şəxsiyyət kimi yanaşılmalı, onun fərdi cəhətləri nəzərə alınmalı və ona hörmət əsasında münasibət göstərilməlidir.
2. Fəal idrak prinsipi
Tədris prosesi elə təşkil olunmalıdır ki, o, idrak fəallığı, təbii öyrənmə fəaliyyəti doğursun, şagirdə «ilk kəşf» sevinci keçirməyə imkan versin, onda yeni biliklərə yiyələnmək həvəsi yaratsın. İdrak fəallığı ilk növbədə təfəkkürün fəallaşdırılması əsasında yaranır. Buna nail olmaq üçün birinci növbədə təlim prosesində idrak fəallığını stimullaşdıran problemli situasiyalar yaradılmalıdır. Uşaqda bu problemin həlli tələbatının yaranması nəticəsində bütün idrak prosesləri də fəallaşır, o, yeni bilikləri kəşf etməyə yönəlir.
3. İnkişafedici təlim prinsipi
Görkəmli rus psixoloqu, müasir pedaqoji psixologiyanın banilərindən biri olan L.S.Vıqotskinin nəzəriyyəsinə görə təlim inkişafı qabaqlamalı, uşağın «qarşıdakı (yaxın) inkişaf zonasına» yönəlməlidir. Bu inkişaf zonasında uşağın potensial imkanları mərkəzləşib, onları aktuallaşdırmaq üçün xüsusi təlim şəraiti yaradılmalıdır. Buna nail olmaq üçün şagirdlərə imkanlarına uyğun, lakin bir qədər mürəkkəb tapşırıqları müstəqil həll etmək təklif edilməlidir. Eyni zamanda, müəllim və digər böyüklər suallar verməklə onları problemin həllinə istiqamətləndirməlidirlər. Yəni təlim uşağın özünün müstəqil fəaliyyəti və ya böyüklərin köməyi sayəsində bilik və bacarıqları əldə etmək üzrə aşkarlanan potensial imkanlarının gerçəkləşdirilməsinə yönəlməlidir. İnkişafedici təlim ilk növbədə təfəkkürü və yaradıcılığı formalaşdırmalıdır.
4. «Qabaqlayıcı təlim» prinsipi
Müasir dövrdə baş verən sürətli dəyişikliklər təlimin qarşısında şagirdlərin həyata hazırlanması məsələsini daha kəskin qoyur. Bunun üçün ilk növbədə təlim cəmiyyətin inkişaf meyillərini əks etdirməli və yeni nəsli yaxın gələcəkdə həyat şəraitinə hazırlamalıdır. Məktəb şagirdə baza bilik, bacarıq və vərdişləri verməklə kifayətlənməməlidir. O, eyni zamanda onda idraki fəallığı, hər şeyi öyrənmək həvəsi və digər zəruri keyfiyyətləri formalaşdırmalıdır. Təlim şagirdə zəruri olan informasiyanı müstəqil əldə etməyi, onu yenidən işləməyi, düzğün istifadə və tətbiq etməyi öyrətməlidir.
5. Təlim-tərbiyə sisteminin çevikliyi prinsipi
Təlim-tərbiyə sisteminin çevikliyi ilk növbədə onun real şəraitə uyğunlaşmaq qabiliyyətidir. İctimai mühitin və şagirdlərin dəyişən tələbləri nəzərə alınmaqla, tədris planları və proqramlarının məzmunu, təlim-tərbiyə prosesinin təşkili, pedaqoji texnologiyaların seçilməsi sistematik olaraq təzələnməlidir. Çevik təlim-tərbiyə sistemində, daha çox təlimin diferensiallaşmasına, şagirdlər tərəfindən müxtəlif məlumatların işlənilməsi və mənimsənilməsinə üstünlük verilir. Buna nail olmaq üçün müəllim hər bir şagirdə fərdi yanaşmağa, təlimdə müxtəlif bilik mənbələrindən və məlumatı təqdimetmə formalarından (görmə, eşitmə, hiss etmə və s. duyğulara əsaslanan) istifadə etməyə çalışmalıdır. Təlim-tərbiyə sisteminin çevikliyi bir nəticə olaraq biliklərin daha çox yaradıcı və tətbiqi olmasında öz əksini tapır, şagirdlər təlim məqsədlərini qoymağa özləri cəhd edirlər.
6. Əməkdaşlıq prinsipi
«Müəllim-şagird» qarşılıqlı münasibətləri sistemində bu subyektlərin hər biri təlim prosesində tərəf müqabili kimi iştirak etməlidirlər. Əməkdaşlıq ilk növbədə təlim prosesinin kollegial və dinamik keçməsində öz əksini tapır. Əgər şagird təlim prosesində müəllimlə bərabərhüquqlu şəxs kimi çıxış edirsə, bu onun fəaliyyətində yeni bir keyfiyyət yaradır: şagirdin özünə inamı artır, o öz fikrini çatdırmağa qorxmur, öz potensial imkanlarını gerçəkləşdirir. Əməkdaşlıq prinsipi müəllimdən tələb edir ki, o, şagirdin qiymətləndirilməsində daha çox dəstəkləyici qiymətlərdən istifadə etsin. Əməkdaşlıq təlim mühitini şagird üçün daha əlverişli, fəallaşdırıcı və ruhlandırıcı edir.
7. Dialoji təlim prinsipi
Məsələlərin birgə həlli gedişində özünün və qrup üzvlərinin fikirlərini, imkanlarını və təcrübələrini bölüşə bilmək və bundan qarşılıqlı faydalanmaq məqsədi ilə hər bir şagirdin müzakirələrdə və qrupun işində iştirakı təmin edilməlidir. Təlim prosesində bütün şagirdlərin müxtəlif nöqteyi-nəzərlərini və fikirlərini nəzərə almaqla, dialoji təlim fikir müxtəlifliyinə, tədrisin məzmununu daha da zənginləşdirməyə imkan yaradır, nəticəçıxarma prosesinə müsbət təsir edir.
Bu prinsiplərin həyata keçirilməsi sagirddə səmərəli həyat fəaliyyətinin formalaşması və onun aramsız dəyişən şəraitə uyğunlaşması üçün təsiredici zəruri bacarıqların əldə olunmasına şərait yaradır. Bütün bu prinsiplərin təlim prosesində ən dolğun şəkildə tətbiqi fəal(interaktiv) təlim metodları vasitəsilə mümkündür.

Müəllimlərin bilik və səriştəsinin sınaq qiymətləndirilməsi barədə ən çox verilən suallar

• Sual: Sınaq Qiymətləndirmədə kimlər iştirak edəcək?
• Cavab: Sınaq Qiymətləndirmədə Bakı məktəblərində daimi müəllim vəzifəsini tutan müəllimlər və analıq məzuniyyəti yerinə müddətli müqavilə ilə işləyən müəllimlər
(digər ümumtəhsil müəssisəsində müəllim işləyən əvəzçilər istisna olmaqla) iştirak edəcəkdir.
• Sual: Sınaq Qiymətləndirmədə kimlər iştirak etməyəcək?
• Cavab: Qiymətləndirmədə məktəb direktorları, direktor müavinləri, psixoloqlar, laborantlar, uşaq birliyi rəhbərləri, sosial məzuniyyətdə olan və müvəqqəti əmək qabiliyyətini itirən müəllimlər iştirak etməyəcəkdir.
• Sual: Sınaq qiymətləndirmənin attestasiyadan fərqi nədir?
• Cavab: Təhsil Nazirliyi tərəfindən keçirilən qiymətləndirmə sınaq xarakter daşıyır. Burada əsas məqsəd yaradıcı düşüncəni inkişaf etdirən, təhsilalanın fərdi xüsusiyyətlərini, stimullaşdırma və karyera inkişafını nəzərə alan, səriştənin artırılmasına xidmət edən modelin yaradılması və müəllimlərin peşəkarlıq səviyyəsinin yüksəldilməsidir. Effektiv və harmonik təhsil mühitini yaradılması təhsilalanlara əldə etdikləri biliklərin tətbiq etməsi üçün çox vacibdir. Bu mühitin yaradılması dünya təcrübəsində də istinad edildiyi kimi, təhsilalanların peşəkar bilik və bacarıqlarının vaxtaşırı monitorinqindən keçir.

• Və ən əsası, attestasiyadan aşağı qiymət almış şəxslər sistemdən kənarlaşdırılır, SQ-də isə belə hal mövcud deyil.
• Sual: SQ-də hamı iştirak etməlidirmi?
• Cavab: Bütün müəllimlər bu qiymətləndirmə prosesindən keçməlidir. Təhsilverənlərin peşəkarlıq səviyyəsinin daim yüksəldilməsinin təmin olunmasına şərait yaradan SQ səriştəli təhsilverənin karyera inkişafı üçün mühüm əhəmiyyət kəsb edir. Bu baxımdan təhsilverənlərin bu qiymətləndirmə prosesindən keçməsi onların karyera inkişafı və fəaliyyətinin stimullaşdırılması üçün vacibdir.
• Sual: SQ nəyə xidmət edir?
• Cavab: SQ müəllimlərin peşəkar inkişaf istiqamətlərini, onların karyera inkişafını müəyyənləşdirir, nəticəyönümlü əməkhaqqı sistemini stimullaşdırır, təhsilverənin daim öz bilik və bacarıqlarını artırması üçün münbit şərait yaradır. Bu proses eyni zamanda təhsilverənlərin attestasiyasına hazırlıq xarakteri daşıyır.
• Sual: SQ-dan keçən müəllimlər üçün stimullaşdırıcı tədbirlər nədən ibarət olacaq? Bu tədbirlər müəllimlərin SQ-dən keçməsi üçün kifayət qədər cəlbedici olacaqmı?
• Cavab: SQ prosesində yüksək nəticələr əldə edən müəllimlər maddi və mənəvi stmullaşdırılması nəzərdə tutulur. Bu prosesin attestasiyaya hazırlıq mərhələsi kimi bir növ “əsas döyüşqabağı məşq” olduğunu və təkmilləşmə məqsədilə zəif yerlərin müəyyənləşdirilməsi üçün əsas vasitə olmasını nəzərə alaraq, cəmiyyət tərəfindən müsbət qarşılanacağına ümid edirik. Gələcəkdə bu tip qiymətləndirmənin nəticələrindən təhsilin keyfiyyətinin artırılmasında istifadə olunacaqdır.
• Sual: SQ-dan keçmək üçün yaş həddi müəyyənləşibmi? Bütün müəllimlər bu prosesdən keçməlidirmi?
• Cavab: Hazırda Bakı şəhərində Təhsil Nazirliyi sisteminə daxil olan, müəllimlik fəaliyyəti ilə məşğul olan hər kəs qiymətləndirmədən keçməlidir.
• Sual: SQ nə zaman keçiriləcək?
• Cavab: Təhsil nazirinin müvafiq əmrinə əsasən SQ-nın iyun ayında keçirilməsi nəzərdə tutulub.
• Sual: Qiymətləndirmə hansı ixtisaslar üzrə aparılacaq və neçə sualdan ibarət olacaq?
• Cavab: Qiymətləndirmə 19 ixtisas üzrə və 80 sualdan (40 ixtisas, 20 metodika, 20 kommunikativ sual) ibarət olacaq.
• Sual: SQ-nın nəticəsi nə qədər müddət üçün keçərlidir?
• Cavab: Bu proses tədqiqat xarakteri daşıdığından etibarlılıq müddətindən söhbət gedə bilməz.
• Sual: Müəllimlərin peşəkarlıq səviyyəsi hansı meyara əsasən müəyyən ediləcək?
• Cavab: Müəllimlərin peşəkarlıq səviyyəsi ixtisas bilikləri, metodiki bacarıqlar və kommunikativ qiymətləndirmənin nəticələrinə uyğun olaraq müəyyən ediləcək. Burada hər bir bölmə üzrə verilən cavablara fərdi yanaşılacaq.
• Sual: Əgər bir müəllim üzrlü səbəbdən qiymətləndirmədə iştirak edə bilməzsə, onun üçün yenidən bu prosesdə iştirak etmək imkanı yaradılacaqmı?
• Cavab: Müəllimlərin bu prosesdə iştirakının zəruriliyini nəzərə alaraq, qiymətləndirmə tarixlərinə yaxın müddətdə onların yenidən SQ-da iştirakı üçün şərait yaradılacaq.
• Sual: Cavablar üzrə orta bal necə müəyyənləşdiriləcək?
• Cavab: SQ imtahan olmadığı üçün burada orta bal anlayışı yoxdur.
• Sual: Nəticələr nə zaman, necə və kim tərəfindən elan olunacaq?
• Cavab: Nəticələr qiymətləndirmədən 3 gün sonra BŞTİ tərəfindən ümumtəhsil məktəblərinə göndəriləcək.
• Sual: Qiymətləndirmə İKT vasitəsilə aparılacaq?

MÜƏLLİMLƏRİN SINAQ QİYMƏTLƏNDİRİLMƏSİ nə deməkdir?

MÜƏLLİMLƏRİN  SINAQ  QİYMƏTLƏNDİRİLMƏSİ  İLƏ ƏN ÇOX  VERİLƏN  SUALLAR  VƏ  ONLARA  CAVAB 
12 may tarixində KİV-lərdə  Bakı Şəhəri üzrə Təhsil İdarəsi tərəfindən iyun ayında keçirilməsi nəzərdə tutulan paytaxtın ümumtəhsil məktəblərində çalışan müəllimlərin Sınaq Qiymətləndirilməsi ilə bağlı xəbərlər sürətlə yayıldı.
Qeyd edim ki, Sınaq Qiymətləndirilməsi 3 istiqamətdə - fənn, metodika, kommunikativ qabiliyyətə dair sorğu əsasında aparılması nəzərdə tutulub.Çoxlarını da elə bu məqamlar bir balaca karıxdırıb . Öz anladığım qədər bu  3 qiymətləndirmə istiqamətlərinə aydınlıq gətirməyə çalışam.
1.Sınaq Qiymətləndirilməsinin fənn istiqaməti - müəllimə öz bilik və bacarığını obyektiv dəyərləndirmək, peşəsi üçün əhəmiyyətli olan zəif və güclü cəhətlərini müəyyən etmək imkanı verəcəkdir.
2.Sınaq Qiymətləndirilməsinin metodika istiqaməti üzrə tapşırıqları - kurikulumların tətbiqi, müasir təlim texnologiyaları ilə işləmək bacarığı, şagird nailiyyətlərinin qiymətləndirilməsi və sair kimi məsələləri əhatə edir.
3.Sınaq Qiymətləndirilməsində kommunikativ qabiliyyətə dair sorğu - müəllimlərin sagirdlərlə ünsiyyət qurmaq, özünüidarə keyfiyyətləri və sinifdə münbit psixoloji mühit yarada bilmək bacarıqlarını ehtiva edir.

Sınaq Qiymətləndirilməsinə asanfizika.blogspot.com Veb səhifəsi ilə hazırlaşın!

Əziz müəllim həmkarlarım ,nəzərinizə çatdırım  ki, Sınaq Qiymətləndirilməsi diaqnostik tədqiqat xarakteri daşıyır və müəllimlərin attestasiyasına hazırlıq məqsədilə keçirilir. Yəni ,zəif cavab vermiş müəllimlərin iş yerini itirmək kimi bir təhlükəsi yoxdur.
Qiymətləndirilməilkin olaraq Bakı şəhərinin 12 rayonu üzrə ayrı - ayrı məktəblərdə təşkil olunacaq və 2 saat davam edəcəkdir.
Sınaq Qiymətləndirilməsi ilə müəllimlərin peşəkarlıq səviyyəsinin yüksəldilməsi və karyera inkişafı, onların bilik, bacarıq və səriştəsinin artırılmasına xidmət edən yeni sistemin yaradılmasına başlanılması nəzərdə tutulur.
Qiymətləndirilmənin nəticələrinə əsasən müəllimlərin peşə fəaliyyəti stimullaşdırıcı meyarlarla dəyərləndiriləcək və yeni yanaşmaya uyğun təlim proqramları hazırlanacaqdır. Bu proses, həmçinin müəllimlərin ixtisasartırılması və yenidənhazırlanması üçün əlavə imkanlar yaradacaq, ümumilikdə, təhsilin keyfiyyətinin yüksəlməsini təmin edəcək, əmək fəaliyyətinin və iş şəraitinin optimallaşdırılmasında mühüm rol oynayacaqdır.

Hörmətli fizika fənni müəllimi həmkarlarım,yeri gəlmişkən qeyd edim ki ,"Əyləncəli Fizika Kurikulumu " Veb səhifəmdə sizin bu   Sınaq Qiymətləndirilməsinə hazırlaşmanız üçün kifayət qədər resurslar vardır.Sizə Uğurlar olsun!